ملکہ کوہسارمری میں برفباری کے بعد وادی کا حسن دوبالا

تفصیلات کےمطابق پاکستان کے خوبصورت ترین سیاحتی مقام مری میں گزشتہ رات شروع ہونے والی برفباری آج دن میں بھی وقفے وقفے سے جاری رہی جس کے بعد سیاحوں کی بڑی تعداد میں ملکہ کوہسار مری پہنچ گئی، جبکہ برفباری کی وجہ سےوادی کا حسن دوبالا ہو گیا ہے۔

محکمہ موسمیات کے مطابق مری میں اب تک 6 انچ سے زائد برف پڑ چکی ہے، جبکہ گلیات کے مختلف مقامات پر ایک فٹ سے زائد برف پڑچکی ہے اور یہ سلسلہ اب بھی جاری ہے جبکہ انتظامیہ کی جانب سے سڑکوں سے برف ہٹانے کا کام کیا جارہا ہے۔

دوسری جانب خیبر پختونخوا کے علاقوں ایبٹ آباد اور سوات کے بالائی علاقوں میں تیسرے روز بھی برف باری کا سلسلہ جاری ہے، برف باری دیکھنے کیلئے بڑی تعداد میں سیاحوں کی کالام اور مالم جبہ پہنچ گئی ہے۔

محکمہ موسمیات کے مطابق سوات کے میدانی علاقوں میں بارش اور بالائی علاقوں میں مزید برفباری کا امکان ہے۔